દેશના અનેક રાજ્યોમાં વધતી જતી ગરમી અને હીટવેવની સ્થિતિ વચ્ચે નરેન્દ્ર મોદીએ દેશવાસીઓને સાવચેત રહેવા અને સ્વાસ્થ્યનું ખાસ ધ્યાન રાખવા અપીલ કરી છે. પ્રધાનમંત્રીએ જણાવ્યું કે હાલ દેશના વિવિધ વિસ્તારોમાં તાપમાન સતત વધી રહ્યું છે, જેના કારણે સામાન્ય જનજીવન પર પણ ગંભીર અસર પડી રહી છે. તેમણે લોકોને ઘરની બહાર નીકળતી વખતે પૂરતું પાણી સાથે રાખવા અને પોતાને હાઇડ્રેટેડ રાખવા ખાસ અનુરોધ કર્યો હતો.
પ્રધાનમંત્રીએ સોશિયલ મીડિયા દ્વારા સંદેશ આપતા જણાવ્યું કે ભારે ગરમીમાં બાળકો, વૃદ્ધો અને ખુલ્લામાં કામ કરતા લોકો સૌથી વધુ જોખમમાં હોય છે. તેમણે કહ્યું કે ચક્કર આવવું, ઉબકા આવવા, વધારે થાક લાગવો અથવા બેભાન જેવી સ્થિતિને ક્યારેય અવગણવી નહીં. જો કોઈ વ્યક્તિ ગરમીના કારણે અસ્વસ્થ જણાય તો તેને તરત જ ઠંડી અને છાયાવાળી જગ્યાએ લઈ જઈ પાણી, ORS અથવા અન્ય પ્રવાહી આપવાની સલાહ પણ આપી હતી.
નરેન્દ્ર મોદીએ લોકોને માનવતા અને સંવેદનશીલતા દાખવવા પણ અપીલ કરી હતી. “જો શક્ય હોય તો તરસ્યા વ્યક્તિને એક ગ્લાસ પાણી જરૂર આપો,” એમ કહી તેમણે સમાજમાં સહયોગ અને કરુણાભાવ જાળવવાની વાત કરી હતી. તેમણે પરિવારના વડીલો, માતા-પિતા અને દાદા-દાદીની સમયાંતરે ખબર પૂછવા અને તેમને બપોરના તડકામાં બહાર ન નીકળવાની સલાહ આપવા પણ અનુરોધ કર્યો હતો.
પ્રધાનમંત્રીએ પક્ષીઓ અને પશુઓ પ્રત્યે પણ દયા દાખવવા અપીલ કરી હતી. તેમણે લોકોને પોતાના ઘર, દુકાન, ઓફિસ, બાલ્કની અથવા છત પર પાણીના વાસણ મૂકવા વિનંતી કરી હતી જેથી ગરમીમાં તરસ્યા પક્ષીઓ અને પશુઓને રાહત મળી શકે. “આ કપરા સમયમાં કરુણા અને સંવેદનશીલતા જ સૌથી મોટી સેવા છે,” એમ તેમણે જણાવ્યું હતું.
- હાલ દેશના અનેક વિસ્તારોમાં તાપમાન 45 ડિગ્રીથી વધુ નોંધાઈ રહ્યું છે અને હવામાન વિભાગ દ્વારા હીટવેવની ચેતવણી પણ આપવામાં આવી છે. ગુજરાત સહિતના રાજ્યોમાં પણ આગામી દિવસોમાં ગરમીનો પ્રકોપ યથાવત રહેવાની શક્યતા વ્યક્ત કરવામાં આવી રહી છે.
