ભારતીય શેરબજારમાં આજે સપ્તાહના પ્રથમ ટ્રેડિંગ દિવસે જોરદાર તેજી જોવા મળી છે. ગયા સપ્તાહે ભારે ઘટાડા બાદ રોકાણકારોમાં ફરી ખરીદીનો માહોલ બનતા સેન્સેક્સ 592 પોઈન્ટ સુધી ઉછળી ગયો હતો, જ્યારે નિફ્ટી ફરી 23,700ની સપાટી ઉપર પહોંચી ગયો હતો. બજાર ખુલતાની સાથે જ વિવિધ સેક્ટરમાં ખરીદીનો માહોલ જોવા મળ્યો હતો, જેના કારણે રોકાણકારોના ચહેરા પર ફરી સ્મિત આવ્યું છે.
માર્કેટમાં આવેલી આ તેજી પાછળનું મુખ્ય કારણ છેલ્લા ટ્રેડિંગ સેશનમાં થયેલા ભારે ઘટાડા બાદ રોકાણકારો દ્વારા કરવામાં આવેલી વેલ્યુ બાયિંગ માનવામાં આવી રહ્યું છે. ગયા શુક્રવારે સેન્સેક્સમાં 1,100થી વધુ પોઈન્ટનો ઘટાડો નોંધાયો હતો અને નિફ્ટી 23,550ની નીચે સરકી ગયો હતો. નબળા ચોમાસાની આગાહી, વિદેશી સંસ્થાકીય રોકાણકારો (FII)ની વેચવાલી, અમેરિકા-ઈરાન સંબંધિત અનિશ્ચિતતા અને MSCI રિબેલેન્સિંગ જેવા પરિબળોના કારણે બજારમાં દબાણ આવ્યું હતું.
આજે જોકે IT, એવિએશન અને કન્ઝ્યુમર સેક્ટરના શેરોમાં મજબૂત ખરીદી જોવા મળી હતી. ઇન્ડિગો, ઇન્ફોસિસ અને એશિયન પેઇન્ટ્સ જેવા શેરો શરૂઆતના કારોબારમાં ટોચના ગેઇનર્સ રહ્યા હતા. બજાર નિષ્ણાતોના જણાવ્યા અનુસાર રોકાણકારો હાલમાં વૈશ્વિક પરિસ્થિતિ અને સ્થાનિક આર્થિક સંકેતો પર નજર રાખી રહ્યા છે, પરંતુ હાલ માટે બજારમાં રિકવરીના સંકેતો જોવા મળી રહ્યા છે.
વિશ્લેષકોનું માનવું છે કે આગામી દિવસોમાં ચોમાસું, વૈશ્વિક રાજકીય પરિસ્થિતિ, ક્રૂડ ઓઇલના ભાવ અને વિદેશી રોકાણકારોની ચાલ ભારતીય શેરબજારની દિશા નક્કી કરવામાં મહત્વની ભૂમિકા ભજવશે. હાલમાં બજારમાં સકારાત્મક શરૂઆતથી રોકાણકારોમાં ફરી વિશ્વાસ જાગ્યો છે.
