રાજકોટમાં બાબા બાગેશ્વરની હનુમંત કથાનો ભવ્ય પ્રારંભ, ગુજરાતભરમાંથી ઉમટ્યા ભક્ત
રાજકોટના રેસકોર્સ મેદાન ખાતે આજે બાગેશ્વર ધામના પીઠાધિપતિ ધીરેન્દ્ર કૃષ્ણ શાસ્ત્રીની ત્રણ દિવસીય “સનાતન સેતુ હનુમંત કથા”નો ભવ્ય પ્રારંભ થયો હતો. કથાના પ્રથમ જ દિવસે રાજકોટ સહિત સૌરાષ્ટ્ર, ઉત્તર ગુજરાત, મધ્ય ગુજરાત અને દક્ષિણ ગુજરાતના વિવિધ જિલ્લાઓમાંથી મોટી સંખ્યામાં શ્રદ્ધાળુઓ કથા સ્થળે પહોંચ્યા હતા. કાર્યક્રમને લઈને ભક્તોમાં ભારે ઉત્સાહ અને ભક્તિમય માહોલ જોવા મળ્યો હતો.
સવારે જ કથા સ્થળે ભક્તોની લાંબી કતારો જોવા મળી હતી. બાબા બાગેશ્વરની એક ઝલક મેળવવા અને તેમના મુખેથી હનુમંત કથાનું શ્રવણ કરવા માટે હજારો શ્રદ્ધાળુઓ ઉમટી પડ્યા હતા. સમગ્ર કથા પરિસર “જય શ્રી રામ” અને “બાગેશ્વર ધામ સરકાર”ના જયઘોષથી ગુંજી ઉઠ્યું હતું.
કથાના આયોજન માટે રેસકોર્સ મેદાનમાં વિશાળ ડોમ, એલઇડી સ્ક્રીન, સાઉન્ડ સિસ્ટમ, બેઠક વ્યવસ્થા, પાર્કિંગ તેમજ સુરક્ષાની ખાસ વ્યવસ્થા કરવામાં આવી છે. હજારો ભક્તો સરળતાથી કથાનો લાભ લઈ શકે તે માટે મેદાનને અલગ-અલગ બ્લોકમાં વિભાજિત કરવામાં આવ્યું છે.
ધીરેન્દ્ર કૃષ્ણ શાસ્ત્રીએ પોતાના પ્રારંભિક સંબોધનમાં ભગવાન હનુમાનજીની ભક્તિ, સનાતન સંસ્કૃતિ અને રાષ્ટ્રભાવનાનો સંદેશ આપ્યો હતો. તેમણે સમાજમાં એકતા, સંસ્કાર અને આધ્યાત્મિક જાગૃતિ લાવવાની જરૂરિયાત પર ભાર મૂક્યો હતો.
આગામી બે દિવસ દરમિયાન હનુમંત કથા અને દિવ્ય દરબારનું આયોજન થનાર હોવાથી હજુ વધુ સંખ્યામાં ભક્તો રાજકોટ પહોંચે તેવી શક્યતા વ્યક્ત કરવામાં આવી રહી છે. સમગ્ર શહેરમાં ધાર્મિક ઉત્સવ જેવો માહોલ જોવા મળી રહ્યો છે અને કથાને લઈને શ્રદ્ધાળુઓમાં વિશેષ ઉત્સાહ જોવા મળી રહ્યો છે.
