સુરત:
સુરતમાં જાણીતા લક્ષ્મી ગ્રુપ પર આવકવેરા વિભાગે મોટા પાયે દરોડા પાડતાં શહેરમાં ખળભળાટ મચી ગયો છે. આવકવેરા વિભાગની ટીમે ગ્રુપ સાથે સંકળાયેલા અનેક રહેણાંક અને વ્યાવસાયિક સ્થળોએ એકસાથે તપાસ હાથ ધરી છે. આ તપાસ દરમિયાન અંદાજે 1900 કરોડ રૂપિયાથી વધુના નાણાકીય વ્યવહારો શંકાસ્પદ હોવાનું સામે આવ્યું છે.
આવકવેરા વિભાગની કાર્યવાહી દરમિયાન વિવિધ દસ્તાવેજો, ડિજિટલ રેકોર્ડ તેમજ મહત્વપૂર્ણ ફાઈલોની તપાસ કરવામાં આવી રહી છે. તપાસ દરમિયાન લગભગ 30 કરોડ રૂપિયાની રોકડ રકમ જપ્ત કરવામાં આવી હોવાનું જાણવા મળ્યું છે. આ ઉપરાંત કેટલાક અન્ય નાણાકીય લેવડદેવડ અંગે પણ ઊંડાણપૂર્વક તપાસ ચાલુ છે.
પ્રાપ્ત માહિતી મુજબ લક્ષ્મી ગ્રુપ દ્વારા છેલ્લા કેટલાક વર્ષોમાં થયેલા મોટા વ્યવહારો, શેલ કંપનીઓ અને રોકાણ સંબંધિત વિગતો આવકવેરા વિભાગના રડાર પર આવી છે. દરોડા દરમિયાન અધિકારીઓ દ્વારા એકાઉન્ટ બુક, બેંક ટ્રાન્ઝેક્શન અને ડિજિટલ ડેટાનું વિશ્લેષણ કરવામાં આવી રહ્યું છે.
આ કાર્યવાહી માટે આવકવેરા વિભાગની મોટી ટીમને તૈનાત કરવામાં આવી છે અને તપાસ હજુ પણ ચાલુ છે. અધિકારીઓ દ્વારા સત્તાવાર રીતે વધુ વિગતો જાહેર કરવામાં આવી નથી, પરંતુ આવનારા દિવસોમાં આ મામલે વધુ ખુલાસા થવાની શક્યતા છે.
આ દરોડા બાદ સુરતના વ્યાપારી અને ઉદ્યોગ જગતમાં ચર્ચાઓ તેજ બની ગઈ છે, જ્યારે આવકવેરા વિભાગની કાર્યવાહીથી કરચોરી સામે કડક સંદેશો મળ્યો છે.
