અમદાવાદઃ વેજલપુર વોર્ડ સમિતિની બેઠકમાં મહિલા નેતાઓના પતિની હાજરી
અમદાવાદના વેજલપુર વોર્ડ સમિતિની બેઠકમાં મહિલા કોર્પોરેટરોના સ્થાને તેમના પતિઓની હાજરી જોવા મળતા વિવાદ સર્જાયો છે. ધારાસભ્ય Amit Thakerની અધ્યક્ષતામાં યોજાયેલી બેઠકમાં કોર્પોરેટર જેઠીબેન ડાંગર અને હેમાબેન શાહના પતિ હાજર હોવાનું સામે આવ્યું હતું. ચૂંટાયેલા પ્રતિનિધિઓના બદલે તેમના પતિદેવો બેઠકમાં હાજર રહેતા સ્થાનિક રાજકારણમાં ચર્ચા શરૂ થઈ છે. આ મામલે ધારાસભ્ય અને સંબંધિત અધિકારીઓને જાણ હોવા છતાં તેમણે આંખ આડા કાન કર્યા હોવાના આરોપો પણ ઉઠી રહ્યા છે. સમગ્ર ઘટનાએ મહિલા પ્રતિનિધિત્વ અને સ્થાનિક સ્વરાજ્ય સંસ્થાઓની કાર્યપદ્ધતિ અંગે અનેક સવાલો ઉભા કર્યા છે.
ઇરાનનો એકસાથે 3 દેશો પર ડ્રોન અને મિસાઇલ એટેક
મધ્ય પૂર્વમાં તણાવ વધુ ઘેરો બન્યો છે. ઇરાને એકસાથે કુવૈત, ઇરાક અને બહેરીન પર ડ્રોન તથા મિસાઇલ હુમલા કર્યા હોવાનો દાવો કરવામાં આવ્યો છે. ઇરાનની ઇસ્લામિક રિવોલ્યુશનરી ગાર્ડ કોર્પ્સ (IRGC)એ ખાસ કરીને કુવૈત પર થયેલા હુમલાને લઈને મોટો દાવો કરતાં જણાવ્યું કે કેશમ દ્વીપ પર થયેલા હુમલાનો બદલો લેવામાં આવ્યો છે. IRGCના જણાવ્યા અનુસાર અમેરિકી સૈન્ય ઠેકાણાઓને નિશાન બનાવીને કાર્યવાહી કરવામાં આવી હતી. આ હુમલાઓ બાદ સમગ્ર વિસ્તારમાં સુરક્ષા અને સ્થિરતાને લઈને ચિંતા વધી ગઈ છે અને આંતરરાષ્ટ્રીય સમુદાયની નજર હવે પરિસ્થિતિના આગામી વિકાસ પર મંડાયેલી છે.
પંમચહાલ: ટેકાના ભાવે ખરીદીમાં નવી મર્યાદાથી ખેડૂતોમાં રોષ
પંચમહાલ જિલ્લામાં ટેકાના ભાવે અનાજ ખરીદીના નિયમોમાં રાતોરાત કરાયેલા ફેરફારથી ખેડૂતોમાં ભારે રોષ ફેલાયો છે. મકાઈ, બાજરી અને જુવાર વેચવા માટે APMC ખાતે જથ્થો લઈને પહોંચેલા ખેડૂતોને નવી મર્યાદાના કારણે મુશ્કેલીનો સામનો કરવો પડી રહ્યો છે. નવા નિયમ મુજબ પ્રતિ ખેડૂત પાસેથી ખરીદીની માત્રા મર્યાદિત કરવામાં આવતા ખેડૂતો ચિંતિત બન્યા છે. હાલમાં બજાર ભાવ ખૂબ જ નીચા હોવાથી ટેકાના ભાવે વેચાણ ન થઈ શકે તો ખેડૂતોને આર્થિક નુકસાન ભોગવવાનો વારો આવી શકે છે. અચાનક નિયમોમાં થયેલા ફેરફારથી ખેડૂતોમાં અનિશ્ચિતતા અને અસંતોષનો માહોલ જોવા મળી રહ્યો છે.
કચ્છ: માંડવીના શિરવા ગામે સરકારી જમીન પરના દબાણ દૂર કરાયાં
કચ્છ જિલ્લાના માંડવી તાલુકાના શિરવા ગામે સરકારી જમીન પર થયેલા ગેરકાયદે દબાણો સામે તંત્રએ કડક કાર્યવાહી હાથ ધરી હતી. વહીવટી તંત્ર અને પશ્ચિમ કચ્છ પોલીસની સંયુક્ત કામગીરી હેઠળ અસામાજિક તત્વો દ્વારા કરવામાં આવેલા ગેરકાયદે બાંધકામો પર બુલડોઝર ફેરવવામાં આવ્યું હતું. કાદરશા સૈયદ અને અકબરશા સૈયદ નામના આરોપીઓ દ્વારા સરકારી જમીન પર કરવામાં આવેલા દબાણોને તોડી પાડવામાં આવ્યા હતા. ચુસ્ત પોલીસ બંદોબસ્ત વચ્ચે હાથ ધરાયેલી આ કાર્યવાહીમાં અંદાજે એક હજાર ચોરસ મીટર સરકારી જમીન દબાણમુક્ત કરવામાં આવી હતી. તંત્રની આ કાર્યવાહીથી સરકારી મિલકતો પરના ગેરકાયદે કબજાઓ સામે કડક સંદેશો ગયો છે.
