વડાપ્રધાન નરેન્દ્ર મોદી આજથી સેશેલ્સના ત્રણ દિવસીય રાજકીય પ્રવાસે, નેશનલ ડેના ગોલ્ડન જ્યુબિલી સમારોહમાં રહેશે ‘ગેસ્ટ ઓફ ઓનર’
ભારતના વડાપ્રધાન નરેન્દ્ર મોદી આજથી સેશેલ્સના ત્રણ દિવસીય રાજકીય પ્રવાસે જઈ રહ્યા છે. સેશેલ્સના રાષ્ટ્રપતિ પેટ્રિક હર્મિનીના આમંત્રણ પર યોજાઈ રહેલા આ પ્રવાસ દરમિયાન વડાપ્રધાન મોદી સેશેલ્સના 50મા નેશનલ ડેની ગોલ્ડન જ્યુબિલી ઉજવણીમાં મુખ્ય અતિથિ એટલે કે ‘ગેસ્ટ ઓફ ઓનર’ તરીકે હાજરી આપશે. ભારત અને સેશેલ્સ વચ્ચેના મજબૂત અને લાંબા ગાળાના રાજદ્વારી સંબંધોને વધુ મજબૂત બનાવવાના હેતુથી આ મુલાકાતને મહત્વપૂર્ણ માનવામાં આવી રહી છે.
પ્રવાસ દરમિયાન વડાપ્રધાન મોદી અને સેશેલ્સના રાષ્ટ્રપતિ પેટ્રિક હર્મિની વચ્ચે દ્વિપક્ષીય બેઠક યોજાશે. આ બેઠકમાં બંને દેશો વચ્ચેના સહકાર, સમુદ્રી સુરક્ષા, વિકાસ ભાગીદારી, આર્થિક સહયોગ તેમજ હિંદ મહાસાગર ક્ષેત્ર સાથે જોડાયેલા વિવિધ મુદ્દાઓ પર વિસ્તૃત ચર્ચા થવાની શક્યતા છે. બંને દેશો પરસ્પર હિતના પ્રાદેશિક અને વૈશ્વિક મુદ્દાઓ પર પણ વિચારોની આપ-લે કરશે.
આ ઉપરાંત વડાપ્રધાન મોદી સેશેલ્સની નેશનલ એસેમ્બલીને પણ સંબોધિત કરશે. તેઓ સેશેલ્સમાં વસતા ભારતીય મૂળના સમુદાયના પ્રતિનિધિઓ સાથે મુલાકાત કરી તેમની સાથે સંવાદ કરશે. આ પ્રવાસ દરમિયાન ભારતના સશસ્ત્ર દળોની ટુકડી અને ભારતીય નૌસેનાના બે જહાજો પણ સેશેલ્સના નેશનલ ડે સમારોહમાં ભાગ લેશે, જે બંને દેશો વચ્ચેના વ્યૂહાત્મક અને સંરક્ષણ સહયોગનું પ્રતીક માનવામાં આવે છે.
