હોંગકોંગ સિક્સીસ 2025 7 નવેમ્બરથી શરૂ થવાની છે અને 9 નવેમ્બર સુધી ટીન ક્વોંગ રોડ રિક્રિએશન ગ્રાઉન્ડ ખાતે રમાશે. આ રોમાંચક છ ઓવરની ટુર્નામેન્ટ માટે ભારતની ટીમની જાહેરાત કરવામાં આવી છે. ભારતીય ટીમ માટે કુલ સાત ખેલાડીઓની પસંદગી કરવામાં આવી છે, અને ટીમનું નેતૃત્વ અનુભવી વિકેટકીપર-બેટ્સમેન દિનેશ કાર્તિક કરશે. ટીમમાં આંતરરાષ્ટ્રીય સ્ટાર્સ તેમજ સ્થાનિક ક્રિકેટના દિગ્ગજોનો સમાવેશ થાય છે.
હોંગકોંગ સિક્સીસ માટે ભારતની ટીમની જાહેરાત
સૌથી મોટા સમાચાર ગયા વર્ષના કેપ્ટન રોબિન ઉથપ્પાની ટીમમાં વાપસી છે. 2007ના T20 વર્લ્ડ કપ વિજેતા ઉથપ્પાએ 2024માં આ ટુર્નામેન્ટમાં ઓમાન સામે માત્ર 13 બોલમાં 52 રનની ધમાકેદાર ઇનિંગ રમી હતી. ટોચના ક્રમમાં તેની વિસ્ફોટક બેટિંગ ભારતને ઝડપી શરૂઆત આપવામાં મહત્વપૂર્ણ ભૂમિકા ભજવશે. ગયા વર્ષની ટુર્નામેન્ટમાં સૌથી સફળ ભારતીય બેટ્સમેન રહેલા ભરત ચિપલીને પણ ટીમમાં સામેલ કરવામાં આવ્યો છે.
તેણે કુલ ૧૫૬ રન બનાવ્યા હતા, જેમાં પાકિસ્તાન સામે ૧૬ બોલમાં અણનમ ૫૩ રનનો સમાવેશ થાય છે. ઓલરાઉન્ડર સ્ટુઅર્ટ બિન્ની આ વખતે હોંગકોંગ સિક્સેસ ટુર્નામેન્ટમાં પણ જોવા મળશે. જમણા હાથનો મધ્યમ-ફાસ્ટ બોલર અભિમન્યુ મિથુન બોલિંગ વિભાગનું નેતૃત્વ કરશે. ટેસ્ટ અને વનડેમાં ભારત માટે રમી ચૂકેલા મિથુન પાસે ઘરેલુ ક્રિકેટમાં ૩૩૦ થી વધુ ફર્સ્ટ ક્લાસ વિકેટ છે. ડાબોડી સ્પિનર શાહબાઝ નદીમ અને બેટ્સમેન પ્રિયંક પંચાલ પણ ભારતીય ટીમનો ભાગ છે.
પાકિસ્તાન સાથે ટક્કર થશે
ભારતીય ટીમ આ ટુર્નામેન્ટમાં પાકિસ્તાન સામે પોતાના અભિયાનની શરૂઆત કરશે. બંને ટીમો 7 નવેમ્બરે એકબીજા સામે ટકરાશે. ત્યારબાદ 8 નવેમ્બરે કુવૈતનો સામનો કરશે. ત્યારબાદ ભારતીય ટીમ અફઘાનિસ્તાનનો સામનો કરશે. ત્યારબાદ સેમિફાઇનલ અને ફાઇનલ મેચ રમાશે.
ભારતીય ટીમ
દિનેશ કાર્તિક (કેપ્ટન), રોબિન ઉથપ્પા, ભરત ચિપલી, સ્ટુઅર્ટ બિન્ની, અભિમન્યુ મિથુન, શાહબાઝ નદીમ, પ્રિયંક પંચાલ.
