બદ્રીનાથ યાત્રામાં ભારે ભીડ, જોશીમઠ નજીક કલાકો સુધી ટ્રાફિક જામ; યાત્રાળુઓ પરેશાન
ઉત્તરાખંડની પ્રસિદ્ધ બદ્રીનાથ યાત્રામાં આ વર્ષે રેકોર્ડબ્રેક સંખ્યામાં શ્રદ્ધાળુઓ ઉમટી રહ્યા છે. જેના કારણે જોશીમઠથી બદ્રીનાથ જતાં માર્ગ પર અનેક સ્થળોએ લાંબા ટ્રાફિક જામના દૃશ્યો જોવા મળી રહ્યા છે. સોશિયલ મીડિયામાં વાયરલ થઈ રહેલા વીડિયોમાં હજારો વાહનોની કતારો જોવા મળી રહી છે, જ્યાં યાત્રાળુઓને કલાકો સુધી રસ્તા પર જ અટવાઈ રહેવું પડી રહ્યું છે. ચારધામ યાત્રામાં આ વર્ષે નોંધપાત્ર ભીડને કારણે માર્ગ વ્યવસ્થાપન તંત્ર માટે પણ પડકાર ઊભો થયો છે.
જોશીમઠ-બદ્રીનાથ માર્ગ પર્વતીય અને સંવેદનશીલ વિસ્તાર હોવાથી વાહનોની અવરજવર મર્યાદિત ગતિએ થાય છે. બીજી તરફ, માર્ગ પર કેટલીક જગ્યાએ મરામત કામગીરી, ભૂસ્ખલનનો ભય અને સંકુચિત રસ્તાઓને કારણે ટ્રાફિકનું દબાણ વધુ વધી રહ્યું છે. તાજેતરમાં જોશીમઠ નજીક ભૂસ્ખલન અને કાટમાળ પડવાની ઘટનાઓના કારણે પણ યાત્રા પ્રભાવિત થઈ હોવાનું સામે આવ્યું છે.
વાયરલ થયેલા વીડિયોને લઈને દેશભરમાં ચર્ચા ચાલી રહી છે. અનેક લોકો યાત્રાળુઓને અગાઉથી આયોજન કરીને જ યાત્રા કરવા સલાહ આપી રહ્યા છે, જ્યારે કેટલાક લોકો યાત્રામાર્ગ પર પૂરતી સુવિધાઓ અને ટ્રાફિક મેનેજમેન્ટના અભાવ અંગે સવાલો ઉઠાવી રહ્યા છે. જોકે ભારે ભીડ અને પડકારજનક પરિસ્થિતિઓ છતાં શ્રદ્ધાળુઓમાં બદ્રીનાથ ધામના દર્શન માટેનો ઉત્સાહ યથાવત જોવા મળી રહ્યો છે. ચારધામ યાત્રામાં વધતી ભીડને ધ્યાનમાં રાખીને તંત્ર દ્વારા સતત મોનીટરીંગ અને સુરક્ષા વ્યવસ્થા વધારવામાં આવી રહી છે.
