કેલિફોર્નિયામાં B-52 બોમ્બર દુર્ઘટના: અમેરિકન એરફોર્સને મોટો ફટકો, 8 કર્મચારીઓના મોત
અમેરિકાના કેલિફોર્નિયા રાજ્યના મોજાવે રણ વિસ્તારમાં આવેલા એડવર્ડ્સ એર ફોર્સ બેઝ પર અમેરિકન વાયુસેનાનું B-52 સ્ટ્રેટોફોર્ટ્રેસ બોમ્બર વિમાન ટેકઓફ બાદ થોડી જ મિનિટોમાં તૂટી પડતાં તેમાં સવાર તમામ 8 લોકોના મોત થયા છે. એરફોર્સે આ ઘટનાને “અનસર્વાઇવેબલ ક્રેશ” ગણાવી છે, એટલે કે અકસ્માત એટલો ગંભીર હતો કે કોઈના બચવાની શક્યતા નહોતી.
માહિતી મુજબ આ વિમાન નિયમિત પરીક્ષણ મિશન પર હતું અને એરફોર્સના રડાર આધુનિકીકરણ કાર્યક્રમ સાથે સંકળાયેલી ટેસ્ટ ફ્લાઇટ કરી રહ્યું હતું. સ્થાનિક સમય મુજબ સવારે લગભગ 11:20 વાગ્યે વિમાન રનવે પરથી ઉડાન ભર્યા બાદ અચાનક નિયંત્રણ ગુમાવી બેઠું અને એરબેઝની અંદર જ ધરાશાયી થઈ ગયું હતું. વિમાન જમીન સાથે અથડાતાં જ ભીષણ આગ ભભૂકી ઉઠી હતી અને આકાશમાં કાળા ધુમાડાના ગોટેગોટા જોવા મળ્યા હતા.
મૃતકોમાં એરફોર્સના સૈનિકો ઉપરાંત સરકારી નાગરિક કર્મચારીઓ અને ખાનગી કોન્ટ્રાક્ટર કંપનીઓના કર્મચારીઓનો સમાવેશ થાય છે. અહેવાલો મુજબ બે કર્મચારીઓ અમેરિકન એરોસ્પેસ કંપની બોઇંગ સાથે સંકળાયેલા હતા. પરિવારજનોને જાણ કરવાની પ્રક્રિયા પૂર્ણ ન થાય ત્યાં સુધી મૃતકોની ઓળખ જાહેર કરવામાં આવી નથી.
ઘટના બાદ સમગ્ર એડવર્ડ્સ એર ફોર્સ બેઝને તાત્કાલિક બંધ કરી દેવામાં આવ્યો હતો. તમામ આવનારી ફ્લાઇટોને અન્ય એરબેઝ તરફ ડાયવર્ટ કરવામાં આવી હતી અને મુલાકાતીઓ માટેના પાસ પણ રદ કરાયા હતા જેથી બચાવ અને તપાસ કામગીરીમાં કોઈ અવરોધ ન આવે.
ઉડ્ડયન સુરક્ષા નિષ્ણાત જેફ ગુઝેટ્ટીના જણાવ્યા અનુસાર વિમાન ટેકઓફ પછી ઊંચાઈ મેળવવામાં નિષ્ફળ રહ્યું હતું અને પાયલોટને ઇમરજન્સી લેન્ડિંગ અથવા પરત ફરવાની તક પણ મળી નહોતી. આથી ફ્લાઇટ કંટ્રોલ સિસ્ટમમાં ખામી, એન્જિન નિષ્ફળતા અથવા જાળવણી બાદની ટેકનિકલ સમસ્યાની આશંકા વ્યક્ત કરવામાં આવી રહી છે. જોકે અકસ્માતનું સાચું કારણ તપાસ પૂર્ણ થયા બાદ જ સ્પષ્ટ થશે.
B-52 સ્ટ્રેટોફોર્ટ્રેસ વિશ્વના સૌથી શક્તિશાળી અને લાંબા અંતરના બોમ્બર વિમાનોમાંનું એક છે. 1955થી સેવા આપતું આ વિમાન પરમાણુ તેમજ પરંપરાગત હથિયારો વહન કરવાની ક્ષમતા ધરાવે છે. અમેરિકન વાયુસેનાના બોમ્બર કાફલામાં આજે પણ તેની મહત્વપૂર્ણ ભૂમિકા છે. આ દુર્ઘટના છેલ્લા ઘણા વર્ષોમાં B-52 સાથે જોડાયેલી સૌથી ગંભીર અને જાનહાનિવાળી ઘટનાઓમાંની એક માનવામાં આવી રહી છે.
અમેરિકન એરફોર્સે ઘટનાની ઉચ્ચસ્તરીય તપાસના આદેશ આપ્યા છે. પ્રાથમિક અંદાજ મુજબ તપાસ પૂર્ણ થવામાં છ મહિના જેટલો સમય લાગી શકે છે.
