અમૃત ભારત સ્ટેશન યોજના હેઠળ ભક્તિનગર રેલવે સ્ટેશનને મળ્યો નવો અવતાર, પશ્ચિમ રેલવે દ્વારા વિકાસ કાર્યોની માહિતી જાહેર
રાજકોટનું ભક્તિનગર રેલવે સ્ટેશન હવે આધુનિક સુવિધાઓ અને આકર્ષક માળખા સાથે મુસાફરોને આવકારવા તૈયાર બન્યું છે. ‘અમૃત ભારત સ્ટેશન યોજના’ અંતર્ગત સ્ટેશનના પુનર્વિકાસના કામ પૂર્ણ થયા બાદ પશ્ચિમ રેલવેના મુખ્ય જનસંપર્ક અધિકારી શ્રી વિનીત અભિષેકે મીડિયા પ્રતિનિધિઓને વિવિધ વિકાસ કાર્યો અંગે માહિતગાર કર્યા હતા.
શ્રી વિનીત અભિષેકે જણાવ્યું હતું કે ભારત સરકારના વિઝન મુજબ દેશભરના મહત્વના રેલવે સ્ટેશનોને આધુનિક અને મુસાફર કેન્દ્રિત બનાવવાના પ્રયાસો ચાલી રહ્યા છે. તેના ભાગરૂપે ભક્તિનગર રેલવે સ્ટેશનનું પણ આધુનિકીકરણ કરવામાં આવ્યું છે, જેથી મુસાફરોને વધુ આરામદાયક અને સુરક્ષિત મુસાફરીનો અનુભવ મળી શકે.
પુનર્વિકાસ બાદ સ્ટેશન પર આધુનિક પ્રવેશદ્વાર, વિશાળ પ્રતીક્ષાલય, નવા પ્લેટફોર્મ સુવિધાઓ, સુધારેલી લાઇટિંગ વ્યવસ્થા, સ્વચ્છતા માટે ખાસ આયોજન, ડિજિટલ માહિતી પ્રણાલી તેમજ સીસીટીવી આધારિત સુરક્ષા વ્યવસ્થા ઉપલબ્ધ કરાવવામાં આવી છે. સ્ટેશન પર દિવ્યાંગ મુસાફરોને ધ્યાનમાં રાખીને રેમ્પ અને અન્ય જરૂરી સુવિધાઓ પણ વિકસાવવામાં આવી છે.
તેમણે વધુમાં જણાવ્યું કે સ્ટેશનના સૌંદર્યીકરણ સાથે મુસાફરોને સરળ અવરજવર મળે તે માટે વિવિધ માળખાકીય સુધારાઓ પણ કરવામાં આવ્યા છે. સ્ટેશનનો નવો લુક સ્થાનિક લોકો અને મુસાફરો માટે આકર્ષણનું કેન્દ્ર બનશે. ભક્તિનગર સ્ટેશન માત્ર ટ્રાન્સપોર્ટ હબ નહીં પરંતુ શહેરની આધુનિક ઓળખ તરીકે પણ ઉભરી આવશે.
મીડિયા સાથેની મુલાકાત દરમિયાન રેલવે અધિકારીઓએ સ્ટેશનના વિવિધ વિભાગોની મુલાકાત કરાવી હતી અને યોજનાના અંતર્ગત થયેલા કાર્યો વિશે વિગતવાર માહિતી આપી હતી. રેલવે તંત્રના જણાવ્યા અનુસાર ભવિષ્યમાં પણ મુસાફરોની જરૂરિયાતોને ધ્યાનમાં રાખીને વધુ સુવિધાઓ ઉમેરવાની યોજના છે.
રાજકોટ અને સૌરાષ્ટ્ર વિસ્તારના હજારો મુસાફરો માટે ભક્તિનગર રેલવે સ્ટેશનનો આ વિકાસ એક મહત્વપૂર્ણ ભેટ સમાન માનવામાં આવી રહ્યો છે. આધુનિક સુવિધાઓથી સજ્જ આ સ્ટેશન હવે રેલવે મુસાફરીને વધુ સરળ, સુરક્ષિત અને સુખદ બનાવશે.
