સુરતમાં કપલ સ્વેપિંગ મુદ્દે યુવતીના ગંભીર આક્ષેપ, ડિસ્ટ્રિક્ટ કોર્ટમાં કેસ ચાલુ
સુરત શહેરમાં કથિત કપલ સ્વેપિંગ મામલે એક યુવતીએ ગંભીર અને ચોંકાવનારા આક્ષેપો કરતા સમગ્ર મુદ્દો ફરી ચર્ચામાં આવ્યો છે. યુવતીના જણાવ્યા અનુસાર, તેના લગ્ન સુરતમાં થયા હતા અને લગ્નના માત્ર ત્રણ મહિના બાદ તેના પતિએ તેને કપલ સ્વેપિંગ અંગે જાણ કરી હતી. યુવતીએ દાવો કર્યો કે આ પ્રકારની પ્રવૃત્તિઓ માત્ર વ્યક્તિગત ઓળખાણ સુધી મર્યાદિત નથી, પરંતુ ઓનલાઈન પ્લેટફોર્મ અને સોશિયલ મીડિયા માધ્યમથી પણ તેનું સંચાલન થતું હોવાનું તેને જાણવા મળ્યું હતું.
યુવતીના આક્ષેપ મુજબ, કપલ સ્વેપિંગમાં સમાજના વિવિધ વર્ગના લોકો સંકળાયેલા હોય છે. જોકે, તેણે આ પ્રવૃત્તિમાં જોડાવા માટે સ્પષ્ટ ઇનકાર કર્યો હતો. યુવતીનો આક્ષેપ છે કે તેના ઇનકાર બાદ તેના પતિ સહિત કેટલાક લોકોએ તેના પર શારીરિક અને માનસિક અત્યાચાર ગુજાર્યો હતો અને તેની સાથે મારપીટ પણ કરવામાં આવી હતી. આ સમગ્ર મામલે તેણે કાયદાકીય કાર્યવાહી હાથ ધરી હતી અને હાલમાં આ કેસ ડિસ્ટ્રિક્ટ કોર્ટમાં ચાલી રહ્યો છે.
આ મામલો સામે આવ્યા બાદ સમાજમાં અનેક પ્રકારની ચર્ચાઓ શરૂ થઈ છે. જોકે, યુવતી દ્વારા કરવામાં આવેલા તમામ આક્ષેપોની સત્તાવાર રીતે હજુ સુધી પુષ્ટિ થઈ નથી. કોર્ટમાં કેસ વિચારાધીન હોવાથી તપાસ અને કાનૂની પ્રક્રિયા પૂર્ણ થયા બાદ જ સમગ્ર હકીકત સ્પષ્ટ થશે. પોલીસ અને સંબંધિત તંત્ર દ્વારા પણ મામલાની વિગતોને ધ્યાનમાં રાખી જરૂરી કાર્યવાહી કરવામાં આવી રહી હોવાનું જાણવા મળે છે.
