- રાજકોટમાં લૂંટ કરનાર ત્રિપુટી ઝડપાઈ, નકલી પોલીસ બની ગુનો કરનાર આરોપીઓ ફરી પકડાયા
રાજકોટ શહેરમાં લૂંટની ઘટનાને અંજામ આપનાર ત્રિપુટી ને એ ડિવિઝન પોલીસે ઝડપી લીધી છે. આ ત્રિપુટી અગાઉ પણ નકલી પોલીસ બની લોકોને છેતરતા પકડાઈ ચૂકી હતી, અને હવે ફરી લૂંટના ગુનામાં ઝડપાઈ જતા શહેરમાં ચકચાર મચી ગઈ છે.
પકડાયેલા આરોપીઓમાં સમીર ચાનીયા, સલીમ ઠેબા અને અજરુદીન સફિયાનો સમાવેશ થાય છે. પોલીસે આપેલી માહિતી મુજબ, ત્રણેય આરોપીઓ એકબીજાના સતત સંપર્કમાં હતા અને પૂર્વયોજિત રીતે લૂંટની ઘટનાને અંજામ આપ્યો હતો. લૂંટ દરમિયાન આરોપીઓએ બાઈક અને મોબાઈલ ફોનની ચોરી કરી હતી.
ખાસ વાત એ છે કે આ પહેલાં સમીર ચાનીયા અને સલીમ ઠેબા નકલી પોલીસ બનીને ગુનો કરતા પકડાઈ ચૂક્યા હતા, છતાં જામીન બાદ ફરી ગુનાખોરી તરફ વળ્યા હતા. આરોપીઓની ગુનાહિત પૃષ્ઠભૂમિ સામે આવતા પોલીસે વધુ પૂછપરછ શરૂ કરી છે.
એ ડિવિઝન પોલીસે ત્રણેય આરોપીઓની ધરપકડ કરી વધુ તપાસ હાથ ધરી છે. પોલીસનું માનવું છે કે પૂછપરછ દરમિયાન અન્ય લૂંટના ગુનાઓ અંગે પણ ખુલાસા થવાની શક્યતા છે. હાલ આરોપીઓને કોર્ટમાં રજૂ કરવાની કાર્યવાહી ચાલી રહી છે અને શહેરમાં ગુનાખોરી સામે કડક કાર્યવાહીનો સંદેશ આપવામાં આવ્યો છે.
