- રણોત્સવમાં વૈશ્વિક રંગ, વિદેશી મહેમાનો સાથે સંસ્કૃતિનો અનોખો ઉત્સવ
કચ્છના ધોરડો ખાતે ચાલી રહેલા વિશ્વપ્રસિદ્ધ રણોત્સવમાં વિદેશી મહેમાનોના આગમનથી ઉત્સવ વધુ ભવ્ય બની ગયો છે. અનેક દેશોમાંથી આવેલા પ્રવાસીઓ રણોત્સવની અનોખી રેતી, લોકસંસ્કૃતિ અને પરંપરાગત કલાને નજીકથી નિહાળી રહ્યા છે. વિદેશી મહેમાનોના સ્વાગત સાથે જ રણોત્સવમાં આંતરરાષ્ટ્રીય માહોલ સર્જાયો છે.
આ વર્ષે રણોત્સવમાં દેશી લોકગીત, ગરબા, રાસ અને કચ્છી લોકનૃત્યની સાથે વિદેશી ગીત-સંગીત અને આંતરરાષ્ટ્રીય કલાકારોની કલાપ્રસ્તુતિ પણ ઉમેરાઈ છે. એક જ મંચ પર ભારતીય લોકસંસ્કૃતિ અને વિદેશી કલા રજૂ થવાને કારણે દર્શકો માટે આ અનુભવ યાદગાર બનશે. પ્રવાસીઓ ખાસ કરીને કચ્છની હસ્તકલા, સ્થાનિક ભોજન અને પરંપરાગત જીવનશૈલી તરફ આકર્ષાઈ રહ્યા છે.
આવતીકાલે યોજાનારા રંગબેરંગી કાર્યક્રમને લઈને આયોજન સમિતિ દ્વારા તમામ તૈયારીઓ પૂર્ણતાના તબક્કામાં છે. મંચ સજાવટ, લાઇટ-સાઉન્ડ વ્યવસ્થા, કલાકારોના અભ્યાસ તેમજ સુરક્ષા વ્યવસ્થાને લઈને વિશેષ ધ્યાન આપવામાં આવી રહ્યું છે. કાર્યક્રમ દરમિયાન મોટી સંખ્યામાં દેશી-વિદેશી પ્રવાસીઓ ઉપસ્થિત રહેશે તેવી શક્યતા છે.
રણોત્સવ હવે માત્ર પ્રવાસન ઉત્સવ નહીં, પરંતુ ભારતીય સંસ્કૃતિને વૈશ્વિક સ્તરે રજૂ કરતો મહોત્સવ બની રહ્યો છે. દેશી અને વિદેશી કલાનો આ મિલન કચ્છને વિશ્વના પ્રવાસન નકશા પર વધુ મજબૂત સ્થાન અપાવી રહ્યો છે.
