રાજકોટ-ગોંડલ હાઈવે પર તુલીપ પાર્ટી પ્લોટ નજીક બસ અકસ્માતની ઘટના સામે આવી છે. સક્તિમાન કંપનીની કર્મચારી બસના ડ્રાઈવરે સ્ટેરિંગ પરથી કાબૂ ગુમાવતા બસ અચાનક રોડ પરથી ઉતરી ગઈ હતી. અકસ્માત થતાં હાઈવે પર થોડા સમય માટે ટ્રાફિક જામ જેવી સ્થિતિ સર્જાઈ હતી અને આસપાસના લોકોમાં પણ ભયનો માહોલ જોવા મળ્યો હતો.
માહિતી મુજબ બસમાં કંપનીના કર્મચારીઓ સવાર હોવાનું જાણવા મળી રહ્યું છે. અકસ્માત બાદ સ્થાનિક લોકો તરત જ મદદ માટે દોડી આવ્યા હતા અને બસમાં ફસાયેલા લોકોને બહાર કાઢવામાં સહાય કરી હતી. સદનસીબે મોટી જાનહાનિ ટળી હોવાનું પ્રાથમિક તબક્કે જાણવા મળી રહ્યું છે, જોકે કેટલાક લોકોને સામાન્ય ઈજાઓ પહોંચી હોવાની માહિતી મળી રહી છે.
ઘટનાની જાણ થતાં પોલીસ અને ઈમરજન્સી સેવા ટીમ તાત્કાલિક સ્થળ પર પહોંચી હતી. પોલીસે ઘટનાસ્થળે પહોંચી ટ્રાફિક વ્યવસ્થા સંભાળી અને અકસ્માત અંગે વધુ તપાસ શરૂ કરી છે. બસને થયેલા નુકસાનને કારણે હાઈવે પર વાહનોની અવરજવર પર પણ થોડી અસર જોવા મળી હતી.
પ્રાથમિક તપાસમાં ડ્રાઈવરે સ્ટેરિંગ પરથી કાબૂ ગુમાવતા અકસ્માત સર્જાયો હોવાનું સામે આવ્યું છે, જોકે ટેકનિકલ ખામી કે અન્ય કોઈ કારણ જવાબદાર છે કે નહીં તે દિશામાં પણ તપાસ ચાલી રહી છે. સ્થાનિક લોકોએ હાઈવે પર વધતા અકસ્માતોને લઈને ચિંતા વ્યક્ત કરી સાવચેતીપૂર્વક વાહન ચલાવવાની જરૂરિયાત પર ભાર મૂક્યો હતો.
