- 🐆 વાંકાનેરના ગઢીયા ડુંગર વિસ્તારમાં દીપડાની દહેશત, ઝાડીમાં આરામ કરતા દીપડાનો વીડિયો વાયરલ
વાંકાનેર શહેર નજીક આવેલા ગઢીયા ડુંગર વિસ્તારમાં ગઈકાલે સાંજના સમયે અચાનક દીપડાની હાજરીથી સ્થાનિકોમાં ભારે ફફડાટ ફેલાઈ ગયો હતો. રહેણાંક વિસ્તાર અને અવરજવરવાળા માર્ગની નજીક વન્યપ્રાણી દેખાતા લોકોમાં ભયનો માહોલ સર્જાયો છે.
પ્રાપ્ત માહિતી મુજબ, ગઢીયા ડુંગરના ઝાડી-ઝાંખરામાં એક કદાવર દીપડો આરામ કરતો જોવા મળ્યો હતો. આ દ્રશ્ય અચાનક નજરે પડતાં સ્થાનિક લોકો ગભરાઈ ગયા હતા અને થોડા સમય માટે વિસ્તારમાં હાહાકાર જેવી સ્થિતિ સર્જાઈ હતી. છતાં, કેટલાક જાગૃત નાગરિકોએ દૂરથી જ સાવચેતી રાખીને પોતાના મોબાઈલમાં દીપડાના વીડિયો અને ફોટા કેદ કર્યા હતા.
આ વીડિયો હાલ સોશિયલ મીડિયા પર ઝડપથી વાયરલ થઈ રહ્યો છે, જેના કારણે વિસ્તારમાં વધુ ચિંતા અને ચર્ચાનો માહોલ જોવા મળી રહ્યો છે. સ્થાનિકોએ વન વિભાગને તાત્કાલિક પગલાં લેવા અને વિસ્તારમાં પેટ્રોલિંગ વધારવાની માંગ કરી છે.
🚧 જામનગર રોડ પર નવનિર્મિત સાંઢિયા પુલનું નિરીક્ષણ, ટૂંક સમયમાં બ્રિજ ખુલ્લો મૂકાશે
રાજકોટ મહાનગર પાલિકાના કમિશ્નર સહિત મેયર, ડેપ્યુટી મેયર, સ્ટેન્ડિંગ કમિટીના ચેરમેન, દંડક તથા શાસક પક્ષના નેતાએ જામનગર રોડ પર નવનિર્મિત સાંઢિયા પુલની મુલાકાત લઈને કામગીરીનું સ્થળ પર નિરીક્ષણ કર્યું હતું.
અધિકારીઓએ બ્રિજની બાંધકામ કામગીરી, સુરક્ષા વ્યવસ્થા તેમજ અંતિમ તબક્કાની પૂર્ણ થયેલી કામગીરીનું વિગતવાર અવલોકન કર્યું હતું. મુલાકાત દરમિયાન સંબંધિત ઇજનેરો પાસેથી ટેકનિકલ માહિતી મેળવી અને જરૂરી સૂચનો પણ આપવામાં આવ્યા હતા.
મહાનગર પાલિકા તરફથી જણાવવામાં આવ્યું છે કે તમામ કામગીરી હવે પૂર્ણતાની નજીક છે અને અંતિમ ચકાસણી બાદ ટૂંક સમયમાં આ બ્રિજ વાહન વ્યવહાર માટે ખુલ્લો મૂકવામાં આવશે. બ્રિજ શરૂ થતાં જામનગર રોડ પર ટ્રાફિકની સમસ્યામાં નોંધપાત્ર રાહત મળવાની આશા વ્યક્ત કરવામાં આવી છે.
